Үөрэнээччилэр дуобакка ким бастыҥын быһаарыстылар

Дьокуускайга, Дуобат-саахымат республикатааҕы киинигэр, аан дойду хас да төгүллээх чемпиона, гроссмейстер Гаврил Колесов аҕата, Дуобат-саахымат киинин салайааччытынан, СР дуобакка федерациятын толорооччу дириэктэринэн үлэлии сылдьыбыт Гаврил Семенович Колесов кэриэһигэр оскуола алын кылаастарын үөрэнээччилэригэр анаан дуобакка республикатааҕы турнир ыытыллан түмүктэннэ.

 

 

Турнир кылаабынай судьуйата – Бүтүн Россиятааҕы категориялаах судьуйа Гаврил Петрович Винокуров иһитиннэрбитинэн, күрэхтэһии 2009-2010 уонна 2011-2012 сылларга төрөөбүттэргэ ыытыллыбыт. Ол курдук, кыргыттарга да, уолаттарга даҕаны элбэх кыттааччы мустан, бэрт сытыы, тыҥааһыннаах күрэхтэһии буолбут. Оҕолор оонньуур таһымнара улаатан эрэрэ бэлиэтэммит.

2011-2012 сс. төрөөбүт уолаттарга барыта 51 кыттааччы күөн көрүстэ. Түмүккэ кыайыылааҕынан Коля Степанов (ДЮСШ-5) таҕыста. Иккис миэстэни Егор Николаев (ДДТ) ылла. Үһүс бириистээх миэстэҕэ Коля Попов (ДДТ) тигистэ.

Кыргыттарга 40 дуобатчыт күрэхтэстэ. Онуоха биэтэккэ алта кыыс тэҥ очукуолаах кэллилэр. Ол эрээри, быраабыла быһыытынан хаачыстыбанан көрөн Айыына Прокопьева (РШШЦ) бастаата, Юлиана Сафонова (ДЮСШ-5) иккистээтэ, Айсаана Шахурдина (Покровскай) үһүстээтэ. Оттон Сайаана Макарова, Наталья Слепцова, Айталина Оконосова туһааннааҕынан төрдүс, бэһис, алтыс миэстэлэри ыллылар.

2009-2010 сс. төрөөбүт уолаттарга 41 кыттааччыттан Айсаар Колодезников (НПСОШ-2) бэрт эрэллээхтик бастаата. Киниттэн биир очукуонан хаалан Глеб Борисов (НПСОШ-2) иккис миэстэни хааччынна. Оттон Тимур Кириллин (Ньурба) биэс утарсааччытын хаачыстыбанан сабырыйан, үһүс миэстэни ылла.

Бу саастаах кыргыттарга Дайаана Габышева (Нам) бастакы, Саяника Кондратьева (Үөһээ Бүлүү) иккис, Анита Данилова (Нам) үһүс миэстэлэри ыллылар.

Бу ааттары өйдөөн кэбиһиҥ, кинилэр биһиги инники эрэллэрбит. Ким билэр, баҕардар кэнэҕэһин эмиэ Александр Азаров, Гаврил Колесов, Николай Стручков, Матрена Ноговицына курдук Россияҕа, Европаҕа, аан дойдуга тиийэ биллэр күүстээх дуобатчыттар буола улаатан тахсыахтара.

Бүгүҥҥүттэн аны улахан дьоҥҥо 100 харахтаах дуобакка дьахталларга уонна эр дьоҥҥо ССРС спордун маастара И.А. Никифоров кэриэһигэр Саха Республикатын чемпионата саҕаланна. Чемпионакка Николай Гермогенов, Николай Гуляев, Гаврил Колесов, Андрей Федотов, Василий Кычкин, Матрена Ноговицына, Ксения Нахова, Ньургуяна Азарова курдук күүстээх дуобатчыттар кытталлар. Чемпионат ахсынньы 8 күнүгэр түмүктэнэр.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *