Алтан лицейин үлэһиттэригэр көмө оҥоһулунна

Амма улууһун баһылыга Дмитрий Иванов салайааччылаах хамыһыйа тахсан сабыллыбыт лицей үлэһиттэрин кытта көрүстэ. Дьарыктаах буолуу Киинэ учуокка туруорда, сүбэлэри биэрдэ. 


Алтан нэһилиэгэр баар 15№-дээх профессиональнай үөрэхтээһин лицейэ сабыллан, атырдьах ыйыттан үлэһиттэр сарбыллыыга бардылар. Кинилэргэ көмөлөһөр, сүбэлэри биэрэр, кинилэр этиилэрин истэр сыаллаах улуустан анал хамыһыйа тахса сырытта. Хамыһыйа састаабыгар Дьарыктаах буолуу киинин салайааччыта Марфа Дмитриева, Киин инспектора Мария Нохсорова, социальнай көмүскэл управлениетын начальнига Саргылана Константинова, бааһынайдар Ассоциацияларын бэрэссэдээтэлэ Александра Цыпандина, үөрэх управлениетын кадр отделын салайааччыта Виталий Мартынов, экномика управлениетын начальнигын солбуйааччы Прасковья Бессонова бааллар.


Сарсыардаттан Дьарыктаах буолуу киинэ үлэһиттэри кытта көрсөн, кинилэри үлэтэ суох буолуу учуотугар докумуоннарын хомуйан туруорда. “Киин директорыгар Марфа Егоровнаҕа махталбыт улахан. Сабылларбыт туһунан бирикээс тахсыаҕыттан хаста да тахсан сүбэ-ама биэрдэ. Аны бу бары Аммаҕа киирбэккэбит, миэстэтигэр учуокка турбуппут олус абыраллаах”, — диэн үлэһиттэр көрсүһүүгэ эттилэр.


Улуус бааһынайдарын ассоциациятын бэрэссэдээтэлэ Александра Цыпандина үлэтэ суох хаалбыт дьоҥҥо тыа хаһаайыстыбатын салаатыгар баар бырагырааммалар тустарынан билиһиннэрдэ. Үлэһиттэр ону бэркэ сэргээн иһиттилэр, бу салааҕа ылсан үлэлиэхтэрин сөбүн эттилэр. Онтон социальнай управление салайааччыта Саргылана Константинова “социальнай партнерство” диэн бырагыраамманан субсидия ылан эмиэ дьыала тэриниэххэ сөбүн кэпсээтэ, боппуруостарга да эппиэттээтэ.


Лицейгэ буолбут көрсүһүү түмүгэр улуус баһылыгын тутууга солбуйааччы, анал хамыһыйа бэрэссэдээтэлэ Дмитрий ИвановЭһигиттэн киирбит этиилэри, баар кыһалҕалары барытын ырытыахпыт. Бары өртүнэн көмөлөһөргө бэлэммит. Эһиги бэйэҕит эмиэ олорон хаалыман”, -диэн санаатын тириэртэ.
Ааптар: “Амма олоҕо” хаһыат

Сообщение Алтан лицейин үлэһиттэригэр көмө оҥоһулунна появились сначала на Ulus.Media — все главные новости из районов Якутии.

Комментарии закрыты.