Евро-2020: Гаврил Колесов Россия футболистара финал чиэппэригэр тиийиэхтэрэ диэн билгэлиир

Эрдэ эппиппит курдук, 2020 сыллааҕы Европа футболга чемпионатын көрсө биһиги сайтпыт араас тэрээһиннэри салайан ыытар. Ааспыкка сэрэбиэй түмүгүн билиһиннэрбиппит. Аны билигин Евро-2020 сэрэбиэйин кэнниттэн тута сөрөөн “Сэрэбиэйи туох дии саныыгын? Россия хамаандата бөлөҕүттэн тахсыа дуо?” диэн ыйытык биллэрдибит.    

 

 

 

Дуобакка аан дойду элбэх төгүллээх чемпиона, улуу тренер Д.П. Коркин аатынан Саха Республикатын физическэй култуура уонна спорт эйгэтигэр Государственнай бириэмийэтин лауреата, Чурапчы улууһун бочуоттаах гражданина, СР физическэй култуураҕа уонна спорка үтүөлээх үлэһитэ, 1992, 1993, 1996, 1997, 2000, 2002, 2003, 2004 сылларга Саха сирин бастыҥ спортсмена, международнай гроссмейстер Гаврил Колесов футбол бэриниилээх ыалдьааччыта. Кини төһө даҕаны дуобатынан идэтийэн дьарыктаннар, быыс булан футболу кэтээн көрбүтэ ыраатта.

Гаврил Гаврильевич биһиги ыйытыкпытыгар маннык хоруйдаата:

Бу кэлэр Евро-2020 мин санаабар, сүрдээх тыҥааһыннаах оонньуулар буолуохтара. Хас да хамаанда бастыан сөп. Урут маннык чемпионакка киһи улаханнык аахайбатах Дания, Греция хамаандалара бастыы сылдьыбыттара дии. Ол курдук, холобур кылаабынай фавориттартан ураты, Польша да бастаатаҕына соhуйбаппын. Чемпионакка сүүмэрдэнэн киирбит 24  хамаандаттан 10-ча хамаанда бастыан сөп. Ол эрээри, Бельгияны, Англияны, Германияны, Францияны, Италияны кылаабынай фавориттарынан ааҕабын. Испания, Хорватия үчүгэй састааптара мин санаабар кырыйдылар, эдэр сулустара суох.

Голландия 1988 сыллааҕы сулустаах састаабын кэнниттэн улахан ситиhиитэ диэн, 2014 сыллаахха аан дойду чемпионатыгар боруонса мэтээл. Португалияны соҕотох Роналду сатаан өрө тардыбата буолуо, кинилэр төһө даҕаны Европа бүтэһик чемпионатын кыайыылаахтара буолбуттарын үрдүнэн. Плэй-оффка хаhан баҕарар буоларын курдук, элбэх пенальти буолуо. Оттон билэргит курдук, пенальти диэн лотерея.

Россия футболга хамаандатын кыаҕын туһунан этэр буоллахха, муҥутаан чемпионат чиэппэр финалыгар тиийиэн сөп. Бөлөҕүттэн тахсыа, сэрэбиэйэ табыллыбыт дии саныыбын. Дания билигин урукку Лаудруптар, Шмейхель саҕанааҕы курдук састааптара суох. Оттон Финляндияны россияннар кыайыахтаахтар.

Ол оннугар «F» бөлөх “Өлүү айата” буолбут диэххэ сөп: аан дойду чемпионнара французтар, немецтэр, Европа чемпионнара португалецтар бииргэ түбэспиттэр.

Уопсайынан, сэрэбиэй туhунан этэр буоллахха, хамаандалар соччо тэҥэ суох араарыллыбыттар. Саамай куустээх «F» бөлөххө Франция, Германия, Португалия курдук куустээх хамаандалар бииргэ тубэһиэ суохтаах этилэр, холобур ити 3 хамаандаттан биирин «С» бөлөҕү кытта атастастахтарына, састаап тэҥ сыһа буолуо этэ. Ити мин тус санаам.

Элбэх голу Францияттан Гризманн, Мбаппе, Бельгияттан Азар, Лукаку, Англияттан Кейн, Польшаттан Левандовски, Пентек уо.д.а. футболистар киллэриэхтэрин сеп дии саныыбын. Быратаардартан эмиэ элбэх тутулуктаах буолуоҕа. Куртуа, Льорис, Пикфорд курдук быратаардар хамаандаларыгар улаханнык көмөлөһүөхтэрин сөп.

Оттон эһиги, футболу таптааччылар ыйытыкка туох диэн хоруйдуо этигитий?

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *